18/11/2024
Өвлийн улирал хаяанд иржээ. Энэ улиралд байгалийн жамаараа бидний бөөрний тамир доройтдог үе. Иймээс доороосоо даарвал архаг хууч өвчтэй болох, хий давамгай махбодтой хүмүүс бөөрний өвчлөлд өртөх магадлал илүү өндөр байдаг.
Тиймээс аль болох бөөрөө хамгаалж, доороосоо даарахгүй байхыг хичээх хэрэгтэй. Хөлийн ул, шагай, өвдөг, аарцаг, бүсэлхий, ууц хэсгээр даарахгүй дулаан байж, улирал солигдох мөчид халуун жин заслын эмчилгээ хийж монгол төөнө эмчилгээг өвлийн турш бөөрний цэгүүдэд хийхийг зөвлөдөг.
Хүүхдүүд эцэг эхээс авч төрсөн дархлаагаа бөөрөндөө хадгалдаг гэж үздэг бөгөөд айх, цочих үед эртнээс хийж ирсэн зан үйл болох ширгэлэх арга заслаар айдсыг үргээж бөөрийг хамгаалж ирсэн юм билээ шүү.
Бөөр болон айдсын сэтгэл хоорондоо холбоотой.
Хүүхдийн хөлийг үргэлж чийггүй дулаан байлгах хэрэгтэй. Чийгтсэн хөл амархан илч дулаанаа алдаж, даардаг. Хамрын үзүүрийг тэмтэрхэд хүйтэн байвал хөл адилхан хүйтэн байдаг. Тиймээс үргэлж хуурай, ноосон оймс өмсгөж, чийгтсэн даруйд хөлийг угааж, оймсыг сольж үргэлж дулаан хөлтэй явуулах хэрэгтэй.
Ууц, бөгсөн биеэрээ жиндэж даарснаас болоод нуруу татах, нуруугаар хатгуулж өвдөх, тонгойх гэдийхэд өвдөх, өтгөн хатах, шээс хязгаарлагдаж өвдөлттэй шээх гэх мэт олон шиж тэмдэг илэрч болно.
Ямар нэг байдлаар доороосоо нилээн даарсан өдөр орой унтхынхаа өмнө цагаан гаатай эсвэл давстай эсвэл содтой халуун усанд хөлөө дүрж, халуун бүлээн тосоор тосолж, даарахгүй, хүйтэн ус уухгүй гам барьж хүйтний хорыг гадагшлуулах засал эмчилгээг өөртөө болон гэр бүлдээ даруй хийх нь хожмын эрүүл мэндэд тустай.
Тиймээс эрт мэдэж, мэдсэн даруйдаа хэрэгжүүлээсэй гэж та бүхэндээ хуваалцаж байна.
