22/03/2026
ZIYARAR CHARITY FOUNDATION DUTSINMA A GIDAN GYARAN HALI NA KARAMAR HUKUMAR DUTSINMA.
Gidauniyar Charity Foundation Dutsinma ƙarƙashin jagorancin shugabanta, Malam Tanimu Bala Dutsinma, tare da sauran mambobinta, sun kai ziyara zuwa Gidan Gyaran Hali na Karamar Hukumar Dutsinma domin yin barka da Sallah da kuma ƙarfafa zumunci.
Wannan ziyara da aka kai ranar Lahadi, 22/03/2026, na daga cikin ayyukan alheri da gidauniyar ke yi lokaci bayan lokaci, domin tallafawa da kuma kula da ‘yan’uwa a irin waɗannan wurare.
A yayin ziyarar, an samu halartar ɗaya daga cikin manyan malaman karamar hukumar Dutsinma, Malam Kabir Abdullahi Yalwa, wanda ya gabatar da nasiha mai muhimmanci ga mazauna gidan, tare da ƙarfafa musu gwiwa kan gyaran hali da komawa tafarki madaidaici.
A ƙarshe, Gidauniyar ta isar da saƙon ta na tausayi, ƙauna da kuma fatan alheri ga waɗannan bayin Allah, tare da basu gudummawar da za ta taimaka musu wajen gudanar da bukukuwan Sallah cikin sauƙi.
ADDU’A:
Muna roƙon Allah (SWT) Ya karɓi wannan aiki na alheri, Ya saka da mafificin alheri ga Gidauniyar Charity Foundation Dutsinma da dukkan waɗanda s**a taimaka wajen ganin an gudanar da wannan ziyara.
Allah Ya taimaki mazauna wannan gida, Ya sauƙaƙa musu halin da suke ciki, Ya shiryar da su zuwa hanya madaidaiciya, Ya kuma basu damar fita su zama ‘yan ƙasa nagari masu amfani ga al’umma.
Allah Ya ƙara haɗin kai da zaman lafiya a tsakanin al’ummar Dutsinma baki ɗaya, Ya kuma sa mu kasance masu taimakon juna da tausayi a dukkan al’amuranmu.
Amin.
Ofishin Hulɗa da Jama’a
CFD.
