24/08/2026
Wannan tambaya tana daga cikin abubuwan da ke yawan tayar da hankali ga mata da ma’aurata. A al’ada ana jin mutane suna cewa idan mace ta yi amfani da hanyoyin tazarar haihuwa na tsawon lokaci, mahaifarta za ta lalace ko kuma ba za ta sake samun ciki ba. Amma a mahangar kimiyya, wannan magana ba daidai ba ce.
A fahimtar ilimin lafiya, hanyoyin family planning suna aiki ne ta hanyar sarrafa yadda jikin mace ke shirya samun ciki, ba wai lalata mahaifa ba. A mafi yawan hanyoyi, ana amfani da hormones da ke k**a da waɗanda jiki ke samarwa da kansa. Wadannan hormones suna hana fitar ƙwai ko kuma su canza yanayin cikin mahaifa domin hana haɗuwar ƙwayar ƙwai da maniyyi. Wannan tsari yana faruwa ne a matakin aiki na jiki, ba wai a matakin lalata sassan mahaifa ba.
A kimiyya, mahaifa tana da ƙarfin sabuntawa da gyara kanta. Lokacin da mace ta daina amfani da family planning, jiki yana komawa yadda yake a da a hankali. Wannan yana nufin cewa tsarin al’ada da fitar ƙwai zai dawo, kuma damar samun ciki tana dawowa. A wasu hanyoyi k**ar allura, yana iya ɗaukar lokaci kafin hormones su fita daga jiki gaba ɗaya, shi ya sa wasu mata ke ganin jinkiri kafin su samu ciki. Amma wannan jinkirin ba lalacewa ba ne, sai dai jiki yana ɗaukar lokaci ya daidaita kansa.
Dalilin da ya sa wasu mutane ke tunanin cewa family planning na lalata mahaifa shi ne saboda canje-canjen da mace ke gani yayin amfani. Misali, jinin al’ada na iya raguwa ko ya tsaya na wani lokaci. Wannan yana faruwa ne saboda hormones suna rage kaurin bangon mahaifa, wanda a zahiri yana da anfani a wasu lokuta, domin yana rage yawan jini da zafi. Amma mutane da yawa suna ɗaukar wannan a matsayin matsala, alhali wani tsari ne na kimiyya.
Haka kuma, akwai bincike da dama da s**a nuna cewa amfani da hanyoyin family planning na zamani ba ya lalata mahaifa ko hana mace haihuwa a gaba. A maimakon haka, a wasu lokuta yana taimakawa wajen kare lafiyar mahaifa daga wasu matsaloli, k**ar kumburi ko wasu cututtuka da ke iya faruwa idan mace tana samun ciki akai-akai ba tare da tazara ba.
Sai dai k**ar kowanne magani, akwai yiwuwar samun wasu canje-canjen jiki, musamman a farkon amfani. Wadannan na iya haɗawa da sauyin yanayi, ciwon kai ko ɗan jiri. Amma yawanci suna raguwa da lokaci yayin da jiki ya saba. Abin da ya fi muhimmanci shi ne a yi amfani da hanyar da ta dace da jikin mace, kuma a ƙarƙashin kulawar ƙwararren likita.
A ƙarshe, gaskiyar da kimiyya ta tabbatar ita ce: amfani da family planning na tsawon lokaci ba ya lalata mahaifa. Abin da yake faruwa shi ne sauyin aiki na hormones wanda yake wucin gadi. Idan mace ta daina amfani da shi, jiki yana dawowa yadda yake, kuma damar haihuwa tana nan.
Saboda haka, yana da kyau a guji yarda da jita-jita, a nemi ilimi daga masana, domin fahimtar yadda jiki ke aiki shi ne mafi girman kariya ga lafiya.
Nr. Muhammad Mandella X
゚
