03/08/2026
Sama-sama sa Pagsuporta sa Pagpapasuso para sa Mas Malusog na Kinabukasan
Ang unang yakap ng isang ina at ang unang pagsuso ng sanggol sa loob ng unang oras matapos ipanganak ay isang napakahalagang hakbang tungo sa isang malusog na kinabukasan. Sa pagdiriwang ng World Breastfeeding Week, ating kinikilala na ang pagpapasuso ay hindi lamang paraan ng pagpapakain, kundi isang pamumuhunan sa kalusugan, pag-unlad, at kinabukasan ng bawat bata.
Ang gatas ng ina ang pinakamainam at pinakakumpletong pagkain para sa sanggol. Taglay nito ang lahat ng sustansya at tubig na kailangan ng isang sanggol sa unang anim na buwan ng buhay. Dahil dito, inirerekomenda ang eksklusibong pagpapasuso sa unang anim na buwan, nang walang tubig, pulot-pukyutan, glucose, formula milk, o anumang ibang pagkain o inumin.
Mahalaga ring maibigay sa sanggol ang colostrum, ang unang gatas ng ina na madalas tawaging “unang natural na bakuna” ng sanggol. Mayaman ito sa antibodies at mahahalagang sustansya na tumutulong sa pagpapalakas ng resistensya at nagbibigay ng proteksyon laban sa iba’t ibang impeksyon at sakit.
Maraming benepisyo ang pagpapasuso. Para sa sanggol, ito ay nakatutulong sa mas mataas na tsansa ng kaligtasan, tamang paglaki at pag-unlad, mas matatag na resistensya, mas mahusay na pag-unlad ng pag-iisip, at mas malusog na kinabukasan. Nagdudulot din ito ng mas matibay na ugnayan sa loob ng pamilya.
Hindi lamang ang sanggol ang nakikinabang. Ang pagpapasuso ay nakatutulong din sa ina sa mas mabilis na paggaling matapos manganak, pagpapababa ng panganib ng kanser sa suso at obaryo, Type 2 diabetes, at postpartum depression.
Ang matagumpay na pagpapasuso ay hindi lamang responsibilidad ng ina. Mahalaga ang suporta ng ama, pamilya, mga health worker, midwife, nurse, doktor, barangay health workers, at ng buong komunidad. Para sa mga nagtatrabahong ina, maaaring ipagpatuloy ang pagbibigay ng gatas ng ina sa pamamagitan ng tamang pag-e-express at ligtas na pag-iimbak ng breast milk.
Pagkatapos ng anim na buwan, simulan ang pagbibigay ng angkop na complementary foods habang ipinagpapatuloy ang pagpapasuso hanggang dalawang taon o higit pa.
Sa temang “Breastfeeding for a Sustainable Start in Life: Strengthen What Works,” sama-sama nating palakasin ang mga programang sumusuporta sa pagpapasuso. Lumikha tayo ng isang kapaligirang nagbibigay-lakas sa bawat ina upang matagumpay na makapagpasuso at matiyak na bawat bata ay mabibigyan ng pinakamainam na simula sa buhay.
