16/10/2026
RESIDENTE SA PLARIDEL, MISAMIS OCCIDENTAL, LAKIP SA LIMA KA GIDAKOP SA OPERASYON BATOK SA DROGA SA CAGAYAN DE ORO
CAGAYAN DE ORO CITY, Philippines — Usa ka 41-anyos nga residente sa Plaridel, Misamis Occidental, nga giila sa inisyal nga report sa alyas nga Adrian, ang lakip sa lima ka indibidwal nga gidakop sa buy-bust operation ug pagbungkag sa giingong drug den sa Barangay Balulang, Cagayan de Oro City, sa gabii sa Huwebes, Oktubre 15.
Base sa inisyal nga report sa kapulisan, nahitabo ang operasyon alas 11:36 sa gabii sa Adelaida Park Residences. Gipangulohan kini sa Philippine Drug Enforcement Agency (PDEA) Region 10 – Misamis Oriental Provincial Office, uban sa koordinasyon sa Criminal Investigation and Detection Unit sa Cagayan de Oro City Police Office, Police Station 4, ug 1001st Regional Mobile Force Battalion.
Si Adrian, nga gikatahong minyo ug residente sa Barangay Looc, Plaridel, Misamis Occidental, gidakop kauban ang upat pa ka indibidwal nga giila sa report sa mga alyas nga Andrew, 39; Charmaine, 37; Alex, 57; ug Burton, 38. Si Burton giila sa report nga usa ka opisyal sa Bureau of Customs.
Si Charmaine giila sa inisyal nga report isip giingong tig-atiman sa drug den.
Matod sa report, narekober sa mga awtoridad ang duha ka heat-sealed plastic sachet nga adunay puti nga kristal nga substansiya nga gituohang shabu. Gibana-banang lima ka gramo ang kinatibuk-ang gidaghanon niini, nga adunay gikatahong street value nga ₱15,000 ug standard value nga ₱34,000.
Lakip usab sa mga gikatahong narekober ang usa ka ₱1,000 nga papel nga kuwarta nga gigamit isip buy-bust money, usa ka improvised glass pipe, duha ka torch, eyeglass case, ug cellphone.
Narekober usab ang usa ka G***k 21 caliber .45 nga pi***la ug magasin nga gisudlan sa 12 ka buhing bala, sumala sa inisyal nga report.
Ang lima ka gidakop gikatahong posibleng atubangon og mga kaso tungod sa giingong paglapas sa Sections 5, 6, 7, 11, 12 ug 15 sa Article II sa Republic Act No. 9165, o Comprehensive Dangerous Drugs Act of 2002.
