22/05/2026
Laging handa, sanay, at maaasahan—dahil bawat segundo ay mahalaga sa pagligtas ng buhay. 💚💪
Matagumpay na isinagawa ang unang batch ng Basic Life Support (BLS) Seminar-Training para sa mga empleyado ng Ospital ng Lungsod ng San Jose noong Mayo 8, 2026.
Layunin ng pagsasanay na higit pang patatagin ang kaalaman, kasanayan, at kumpiyansa ng ating mga healthcare workers sa agarang pagtugon sa mga sitwasyong nagbabanta sa buhay. Ang mga empleyado ay hinati sa dalawang grupo – ang healthcare providers (HCP) ay kinabibilangan ng mga nurses, midwives, radtech, medtech at nutritionist-dietitian; ang mga Lay Responders (LR) naman ay kinabibilangan ng mga administrative personnel, ambulance drivers at security personnel.
Ang inisyatibong ito ay nakaangkla sa patuloy na pagpapatibay ng Department of Health sa emergency preparedness, alinsunod sa Department Memorandum No. 2021-0134 na nagsusulong ng standardized training programs, at Department Memorandum No. 2025-0542 na nagbibigay-diin sa pagpapalawak ng kapasidad sa pamamagitan ng BLS training.
Sa ilalim ng Health Emergency Management Bureau (HEMB), isinusulong ang adhikain na magkaroon ng hindi bababa sa isang BLS-trained na indibidwal sa bawat tahanan—isang hakbang tungo sa mas matatag at handang komunidad. Kaakibat nito ang Disaster Risk Reduction and Management in Health (DRRM-H) framework na naglalayong tiyakin na ang mga pasilidad pangkalusugan ay ligtas, handa, at may kakayahang magbigay ng tuloy-tuloy na serbisyo sa gitna ng emerhensiya at sakuna.
Pinangunahan ang pagsasanay ng mga trainers mula sa Provincial Health Office—sina G. April Mesina, G. Robert Olanda, Bb. Joan Maureen Sarangaya, at Dr. Nancy Celestino—na nagbahagi ng kanilang mahalagang kaalaman sa life-saving interventions.
Sa bawat natutunan, may buhay na maaaring mailigtas. Ito ang ating pangako—mas pinatatag na kahandaan, mas maaasahang serbisyo, at mas ligtas na komunidad para sa lahat.
