23/08/2026
Ganito kababa ang BP ko nung nakaraang buwan...
..pagkatapos akong magkamali at nagkadoble ang pag-inom ng beta-blocker na maintenance ko for BP.
Siguro sa dami nang sabay-sabay na inaasikaso (kausap/ka-chat ang mga nurses sa ibat-ibang hospitals, mga kapwa doktor, pagbibigay instructions sa clinic at hospital marketing staff, plus sa mga kasambahay, etc etc), akala ko ay hindi ko pa nainom ang gamot ko pagkagising.
Kaya uminom ako ulit after several minutes.
Ito ang mga ginawa ko nang mapagtanto ko na nadoble ang gamot ko para sa BP (para malaman nyo rin ang dapat gawin kung mangyari man ito sa inyo):
1. Umupo o humiga agad nang nakataas ang paa.
Alam ko nang baka magdilim ang paningin ko, mahilo o matumba ako makalipas ang higit na 30 mins (kapag umabot na at nagsimulang matunaw na ang gamot sa tyan ko)--at yun nga ang nangyari. Kaya't dagling humanap ako ng masasandalan at mauupuan na komportable ako.
2. Maghydrate-- mas maganda kung hindi distilled water (dahil wala itong minerals) ang inumin.
3. Magmonitor ng sariling BP mayat-maya--kung digital BP ang gagamitin, kailangang umupo upright habang nagchecheck para mas accurate ang reading na makuha.
4. Bantayan ang mga sintomas--dahil uminom ako ng beta blocker na nagpapabagal ng tibok ng puso, nakabantay din ako sa pulso ko. Mabuti at di naman bumagal ang heart rate ko nang sobra. Maari ring mamawis nang malamig, mahilo, malito, mawala sa sarili, mahirapan huminga.
5. Magpadala na sa hospital ER kung sobrang bumaba ang heart rate (kung nagtake ng beta blocker o mga gamot na ang generic name ay may "-lol" sa dulo, eg. metoprolol, nebivolol, carvedilol) o BP; kung sobra ang hilo at pagdilim ng paningin; kung nahimatay.
Mag-iingat lagi sa pag-inom ng inyong maintenance meds. Importante ang pagiging MINDFUL lagi, kumbaga, ay lagi kang aware, attentive o maingat sa mga gamot at schedule ng paginom. Kapag may problema na sa memorya ang pasyente, kailangang tulungan ng mga kasama sa bahay para magkaroon ng sistema sa pag-iinom--gumamit ng mga pillboxes, pill compartments, maayos na labeling; ipaskil ang medication schedule sa lugar na makikita ito agad ng lahat.
Kapag mayaman sa kaalaman, mayaman sa kalusugan!
Yun lang, ganuon lang.
