14/03/2026
السلام علیکم!
میرے عزیز ساتھیو، لیڈی ریڈنگ ہسپتال سے وابستہ تمام معزز ڈاکٹرز، نرسز، پیرامیڈیکل اسٹاف، ملازمین، دوستوں اور میرے عزیز رشتہ دارؤں!
آج میں دل کی گہرائیوں سے آپ سب کا شکر گزار ہوں۔ بورڈ آف گورنرز نے مجھ پر اعتماد کرتے ہوئے مجھے اس عظیم ادارے کا ہسپتال ڈائریکٹر مقرر کیا ہے، جو میرے لیے نہ صرف اعزاز بلکہ ایک بڑی ذمہ داری بھی ہے۔ میں اپنے تمام دوستوں، ساتھیوں اور خیرخواہوں کا بھی تہہ دل سے شکریہ ادا کرتا ہوں جنہوں نے میری اس تقرری کو سراہا اور میرے حوصلے کو بڑھایا۔
میں آپ سب کو یقین دلاتا ہوں کہ میں اپنی پوری دیانتداری، محنت اور لگن کے ساتھ کوشش کروں گا کہ خیبر پختونخوا کے عوام کو بہترین طبی سہولیات فراہم کی جا سکیں۔ ہماری اولین ترجیح یہ ہوگی کہ ہر مریض کو بروقت، معیاری اور باعزت علاج میسر آئے۔
اس کے ساتھ ساتھ میں ہسپتال کے تمام عملے کی فلاح و بہبود اور بہتر کام کے ماحول کے لیے بھی اپنی استطاعت کے مطابق اقدامات کرنے کی کوشش کروں گا، کیونکہ ایک مضبوط اور2 مطمئن عملہ ہی کسی ادارے کو کامیاب بناتا ہے۔
میں آپ سب دوستوں اور ساتھیوں سے خصوصی درخواست کرتا ہوں کہ عوامی خدمت کے اس مشن میں میرا ساتھ دیں۔ اگر ہم سب مل کر اخلاص اور ٹیم ورک کے ساتھ کام کریں تو ہم اس ادارے کو مزید بہتر، منظم اور عوام دوست بنا سکتے ہیں۔
آخر میں، میں ایک بار پھر آپ سب کا دل سے شکر گزار ہوں۔ یہ مقام میرے والدین کی دعاؤں، اساتذہ کی رہنمائی اور آپ سب کی محبت اور اعتماد کا نتیجہ ہے۔ میں اللہ تعالیٰ سے دعا گو ہوں کہ وہ مجھے توفیق دے کہ میں آپ سب کی امیدوں پر پورا اتر سکوں اور اس ادارے اور عوام کی خدمت بہتر انداز میں کر سکوں۔
بہت شکریہ۔
جزاکم اللہ خیراً۔
