Dealing with Ovarian Cancer

Dealing with Ovarian Cancer صفحه متعلقة بالتوعية عن سرطان المبيض و تقديم النصائح للمصابات او الناجيات منه او من يعانون من اصابة شخص مقرب لهم ويجهلون كيفية التعامل معه

زي ما وضحنا سابقا انو السرطان ممكن يرجع تاني لا سمح الله بعد نهاية العلاج وبعد تكون المريضة دخلت في مرحله المتابعه الدو...
28/05/2026

زي ما وضحنا سابقا انو السرطان ممكن يرجع تاني لا سمح الله بعد نهاية العلاج وبعد تكون المريضة دخلت في مرحله المتابعه الدورية .... وهنا بيخطر سؤال للكثير من الناس هل المرض لمن يرجع معناها حارجع اخد نفس الادوية الكيماوية القديمة ؟!!
اجابة السؤال هنا ما واحدة وبتعتمد على عوامل كثيرة زي الحالة العامة الصحية للمريضة حاليا هل بتحتمل الادوية السابقة ولا بتحتاج تغيير وكيف كانت استجابتها للادوية السابقة هل كانت استجابة سريعه هل حصلت ليها مضاعفات واعراض جانبية... الخ ومن اهم العوامل متين حصل الارتجاع للمرض !!!
في حالة المرضى اللي حصل ليهم الارتجاع خلال اقل من ٦ شهور غالبا بيتم منح المريضة علاج كيماوي مختلف لانو بتعتبر دي حالة حاصل ليها مقاومة للبلاتين ( اللي هو دواء مهم من ضمن الادوية الخاصة بعلاج سرطان المبيض ) لانو بكون سبب الارتجاع هنا غالبا انو في خلايا دقيقة قدرت تنجو من العلاج الكيماوي السابق واتسببت في الارتجاع ده
اما في حالة المرضى اللي حصل ليهم الارتجاع بعد فترة طويله اكتر من ٦ شهور فديل ايوة غالبا حياخدو نفس العلاج الكيماوي السابق خاصة اذا كانت استجابتهم السابقة ليهو كويسة وما اتعرضو لاعراض جانبية كتيرة وصحتهم الحالية بتسمح
وفي النهايه كل خطه علاجية بتعتمد على حالة المريضة وتقييمها بناء على الطبيب المعالج وكل مريضة بتتخت ليها خطتها العلاجية بما يتناسب مع صحتها ومع العلاج اللي متوقع انو يحقق ليها افضل استجابة وربنا يشفي كل مريضة ويجعل مرضها كفارة ليها ويساعد كل مريضة بتحارب السرطان تنتصر في معركتها سواء كانت معركتها الاولى او معارك لاحقة

وضحنا في البوست السابق انو اهمية المتابعة الدورية انها بتساعدنا على الاكتشاف المبكر اذا حصل رجوع للمرض لا سمح الله .......
24/05/2025

وضحنا في البوست السابق انو اهمية المتابعة الدورية انها بتساعدنا على الاكتشاف المبكر اذا حصل رجوع للمرض لا سمح الله ....ولكن المتابعه الدورية بتتغير فتراتها زي ما وضحنا سابقا بداية من كل ٣ شهور لحدي ما تبقى كل سنه او اكتر و رغم دورها الكبير والمفيد في اكتشاف اي رجوع للمرض بسرعه الا انو احيانا ممكن يحصل الرجوع بين فترات المتابعة وده برجعنا لنقطة انو ما نتجاهل الاعراض الغريبة خاصة اذا استمرت لفترة طويلة اكتر من المعتاد
وهنا حيجينا سؤال شنو الاعراض اللي ممكن تتصاحب مع رجوع المرض ؟!
اولا فقدان الوزن غير المبرر ( يعني انو المريضة تبدا تخسر وزنها تاني بدون ما تكون هي بتحاول تضعف او بتمر بظروف ما قادرة تاكل فيها كويس )
ثانيا : الالام المتكررة في الحوض او البطن و الجوانب ( رغم عدم وجود اي اسباب صحيه مسببة زي التهابات البول مثلا )
ثالثا : الشعور الدائم بالارهاق والفتور رغم اخذ قسط كافي من الرحه
رابعا: الشعور السريع بالشبع
كل الاعراض دي ممكن تكونو لاحظتو انها تقريبا نفس الاعراض اللي ذكرناها في البداية كاعراض دالة على سرطان المبيض ولكنها طبعا ما مقتصرة عليهو فقط ، بس البننصح بيهو انو اذا مريضة متعافية من سرطان المبيض وشعرت بالاعراض المذكورة او اي اعراض غريبة ما تتجاهلها و تحاول تتحصل على استشارة طبية عشان تتطمن اذا كانت الاعراض دي مجرد اعراض متعلقة بمرض تاني ويتعالج برضو ان شاء الله او اذا كانت دي دلالة ارتجاع للسرطان لا سمح الله ووقتها برضو الاكتشاف المبكر بكون عندو دور كبير في نجاح الخطه العلاجية ان شاء الله .
وفي الختام ربنا يحفظ البلاد والعباد ويعين وينصر كل مريضة بتخوض معركتها الخاصة ضد السرطان ودمتم بخير وصحه وسلامة ...

طيب بعد وصلنا للمتابعه الدورية وشرحنا طرقها وكيف بتتم وفتراتها الزمنية حنتكلم عن الحاجه اللي عشانها اصلا بتتعمل المتابعه...
15/05/2025

طيب بعد وصلنا للمتابعه الدورية وشرحنا طرقها وكيف بتتم وفتراتها الزمنية حنتكلم عن الحاجه اللي عشانها اصلا بتتعمل المتابعه الدورية وهي الاكتشاف المبكر لاي ارتجاع للمرض لاسمح الله ..
شنو الارتجاع ده ؟!
الارتجاع هو عودة السرطان او عودة الخلايا السرطانية للنمو مرة اخرى بعد فترة من إكمال العلاج الناجح ، ويحدث في نفس المكان الاول للمرض او في مكان اخر من الجسم
شنو اسبابو ؟!
اسبابه ممكن تكون وجود بقايا خلايا سرطانية ترجع لنشاطها مرة اخرى بعد نهاية العلاج وممكن يكون سببه انه في خلايا سرطانية انتشرت من البداية ولكن كانت اصغر من انو يتم اكتشافها وتشخيصها وغيرها من الاسباب ... ولكن عموما مافي سبب متعلق بسلوك شخصي يعني مافي حاجه بتعملها المريضة سواء اكل شراب او اي انشطة ممكن تكون هي السبب وانما الموضوع كله متعلق بنشاط الخلايا السرطانية
شنو الاعراض اللي ممكن تظهر و شنو الخطوات اللي حتمر بيها المريضة بعد حدوث الارتجاع حنتناول ده في البوست القادم ان شاء الله
وفي الختام دمتم بخير وصحه وسلامة وربنا يحفظ البلاد والعباد ويشفي ويعين وينصر كل مريضة بتخوض معركتها الخاصة مع السرطان .

03/04/2025

مريضتنا كانت في مرحله المتابعه الدورية وكان سؤالنا المتابعه دي حتتم كيف؟؟
المتابعه بتتم عن طريق نوعين من الفحوصات... هم شنو ؟؟
اولا فحوصات الدم ودي بتشتمل علي دلالات الاورام (tumor marker) المتعلقه بسرطان المبيض وتحديدا بنركز علي اكتر واحد كان مرتفع في وقت التشخيص.
و دلالات الاورام دي مفيده جدا في المتابعه خاصة انو في دراسات وضحت انها مرات بتزيد قبل ما الخلايا السرطانيه تكون ظاهره في التصوير وممكن تساعدنا على الاكتشاف المبكر جدا لرجوع المرض لا سمح الله
ثانيا فحوصات التصوير ودي بتشتمل علي الموجات الصوتيه ، الاشعه المقطعيه، الرنين المغطنيسي وفحص مسمى ب ال pet scan....
اقلاهم دقة طبعا هي الموجات الصوتيه لكن ممكن تتم بيها المتابعه احيانا في حال عدم توفر الفحوصات التانيه او لعدم الرغبه في تعريض المريض للفحوصات التانيه... اما الباقيات فممكن نعتبرهم متساوين في الدقه مع تفوق ال pet scan لكن هنا في السودان ما قاعده تطلب
في النهايه الطبيب المعالج ممكن يطلب مننا المتابعه باي واحده من الفحوصات دي بناء علي تقدير الحاله وظروفها والانسب ليها.
وفي الختام رمضان كريم وتصومو وتفطرو علي خير ان شاء الله....
وما تنسوا تشاركو الصفحه والمعلومات اللي فيها مع كل بت بتهمكم .... ودمتم بخير وصحه وسلامه

03/04/2025

طيب اخر حاجه مريضتنا كانت بقت في مرحله المتابعه الدورية وكان السؤال كيف بتكون المتابعه الدورية دي ؟؟
المتابعه دي ممكن نقول انها مقسمه لفترات كالأتي :
اول سنتين بتكون المتابعه الدورية كل ٣ او ٤ شهور.. اذا تمت المريضه السنتين ديل بسلام وبدون ما يرجع المرض بتبدأ الفترة الثانيه
الفترة الثانيه هي ٣ سنوات بتكون فيها المريضه في المتابعه الدورية كل ٦ شهور.. اذا كملتها بسلام وبدون ما يحصل رجوع للمرض بنبدا المرحله الثالثه
المرحله الثالثه هي ٥ سنوات بتكون فيها المتابعه مره في السنه
اذا كملتها المريضه بسلام بتكون كده كملت ١٠ سنوات بدون رجوع للمرض وبعدها بنقدر نقول انها ما محتاجه لمتابعه او ممكن تتابع بس لو حست بتعب او بأي اعراض غريبه
وبعد مرور الفترة دي بكون احتماليه رجوع المرض اصلا بقت بسيطه شديده وتكاد تكون نسبة اصابتها مجددا بسرطان المبيض مساوية لنسبه اصابة اي امرأة لم تسبق لها الاصابه
طيب المتابعه دي حتتم كيف؟؟ ده حنشرحو في البوست القادم ان شاء الله.
وعذرا لتوقف البوستات في الفترة اللي فاتت انشغلت شويه ... لكن دايما بريد الصفحه مفتوح لاستفساراتكم
وفي الختام شاركو الصفحه والمعلومات اللي فيها مع كل بت بتهمكم و دمتم بخير وصحه وعافيه

03/04/2025

طيب بعد مريضتنا كملت رحله العلاج بالسلامه واخر فحوصات ليها كانت نتائجها كلها نظيفه اها هل كده خلاص بتكون اتعالجت من السرطان و انتهت رحلتنا ؟؟
لا ، اذا ده حصل بنقول انو حاليا مافي اثار واضحه للمرض فبنوقف العلاج والمريضه بتفضل تحت المتابعه الدوريه لحدي بعد مده معينه تقضيها بدون يرجع المرض تاني حتى بعدها ممكن نقول انو المريضه بقت خاليه من السرطان
المده دي قدر شنو ؟
بعد ١٠ سنوات والبعض يقول٥ سنوات بدون ما يحصل انتكاس او رجوع للسرطان ولا لمرة واحده وتكون كل نتائج الفحوصات نضيفه وهنا بتكون بقت نسبه تعرضها للسرطان او انو يجيها تاني بقت زي نسبه الناس اللي ما حصل جاهم قبل كده.
اها المتابعه الدورية دي زاتها بتتم كيف؟؟
ده حنجاوبو في البوست اللي جاي ان شاء الله....
ودمتم بخير وصحة وعافية

03/04/2025

لا زلنا مواصلين في رحله العلاج بعد اتشخصت المريضه بسرطان المبيض وعملت العملية بسلام وبدأت رحله العلاج الكيماوي كيف حنعرف انو في استجابه او تحسن؟؟
بعد عدد ٣ او ٤ جرعات كيماوي بيتعمل للمريضه فحوصات دم تحديدا الفحوصات اللي ذكرتها في بوست سابق واللي اسمها tumor marker بالاضافه ليهم بتتعمل صوره مقطعيه او رنين مغناطيسي يتم فيهو متابعه حجم الورم وهل في استجابه او لا وبناء علي نتيجه الفحوصات دي بيتخذ القرار العلاجي
القرار العلاجي ممكن يكون شنو؟؟
القرار حيعتمد علي النتائج لو في استجابه و لسه في بقايا ورم بس حجمها نقص حتتم مواصله العلاج
طيب ولو مافي استجابه او في زياده؟؟
هنا حيتم تغيير الادويه المستخدمه في الكيماوي بانواع اخرى وتتعاد الخطوات السابقه الي ان يوجد نوع بيحقق استجابه ان شاء الله
هل في حد معين من جرعات الكيماوي بعد ما بندي المريضه كيماوي؟؟
الاجابه لا مافي عدد معين ، مبدئيا سرطان المبيض بيقال انو بيحتاج ل ٦ جرعات من العلاج الكيماوي وممكن تقل او تزيد حسب الاستجابه، يعني لو كملنا ال ٦ جرعات ولقينا الورم حجمو نقص لكن لسه ما اختفى تماما حنواصل الي ان يختفي الورم ان شاء الله
طيب ولو نقص ووصل لحجم صغير شدييد لكن ما اختفى وبقى ما بينقص مع الكيماوي حنعمل شنو؟؟ دي حيتم شرحها في بوست لاحق ان شاء الله....
اما الان دمتم بخير وصحه وسلامه

03/04/2025

زي ما وضحت سابقا علاج سرطان المبيض بيعتمد علي جزئين جزء جراحي وعلاج كيماوي ومن الاسئله اللي بتواجه المريضات كتير في رحلة علاج سرطان المبيض متين حأبدأ الكيماوي لو كنت عملت عملية اول او متين حتتعمل لي العملية لو كنت اخدت كيماوي اول؟؟
طيب اذا عملت المريضه العملية اول فبتحتاج من اسبوعين عالاقل ل ٤ اسابيع حتى تبدأ العلاج الكيماوي عشان جرحها يكون قفل وجسمها اخد فرصه للشفاء من العملية لانو التعرض للكيماوي ما حيخلي الجرح يبرأ... مع الملاحظه كمان انها طالما حالتها كانت مستقرة ومافي سبب للتأخير ما مفروض تتأخر اكثر من ٨ اسابيع عشان ما تدي فرصة للخلايا السرطانيه انها تكبر تاني.
في المقابل اذا كانت المريضه جايه من علاج كيماوي ومقررة ليها عملية فكمان هنا مفروض تنتظر اسبوعين او ٣ عالاقل لانو زي ما ذكرت سابقا الكيماوي بيضعف المناعه ولو اتعملت ليها عملية في الفترة دي حتكون معرضه لالتهابات شديده ممكن تضر بصحتها جدا
في النهايه الموضوع بيرجع لقرار الطبيب المعالج ، ف لو في اي حالة من ال ٢ الفوق قالو ليك حتنتظري شويه وما حنبدا كيماوي طوالي او ما حنعمل عملية طوالي ما تقلقي ده لسلامتك وعشان تطلعي بافضل النتائج وما تحصل ليك اي مضاعفات ممكن يكون ضررها اسرع من ضرر السرطان، وفي النهايه في رحلة علاجك دائما عندك حق سؤال الطبيب ومناقشتو وفهم الخطه العلاجية وأسبابها عشان تكوني متطمنه .
ودمتم بخير وصحه وعافية

03/04/2025

طيب في بوست سابق ذكرنا انو من الاعراض الجانبيه للعلاج الكيماوي انو بقلل المناعه وبقلل الدم والصفائح وانو انخفاض المناعه ده بزيد نسبة الالتهابات وبخلي لينا المريضه معرضة للعدوي باي التهاب بسهولة شديده، وذكرنا انو احيانا بيدو المريضه علاج يسمى حقن المناعه ف شنو هي حقن المناعه؟؟
هي حقن بتحتوي علي مواد اسمها growth factor وهي عبارة عن نوع من البروتينات بتحفز نخاع العظام انو ينتج كريات دم بيضاء، وهي عده انواع وموجودة في اشكال تعبئه مختلفه و تحت اسماء تجارية مختلفه لكن بتتفق في التأثير
الحقن دي بتتاخد كيف؟؟
بتتاخد تحت الجلد زي حقن السكري وممكن تتاخد عبر الوريد بحيث تنضاف لدرب ويمرر بالوريد
هل عندها اضرار جانبية او عيوب ؟؟
ايوة احيانا بتسبب حكه واحمرار في مكان الطعن وكمان ممكن تسبب الم في العظام والعضلات و شعور بالفتور والتعب او شعور بالصداع دي اهم الاعراض الجانبيه وفي اعراض جانبيه تانيه لكن نادره شديد... بالاضافه لده احيانا بتكون تكلفتها عاليه واحيانا ما بتكون متوفرة بسهولة
طيب متين بتتاخد وشنو الفترة اللي مفروض تفصل بينها وبين الكيموي؟؟
اقل فترة زمنيه بينها وبين الكيماوي لازم تكون ما اقل من ٢٤ ساعه وبعداك ممكن تزيد باختلاف الانواع
طيب متين بتبدا الحقن دي تشتغل في الجسم ويظهر اثرها؟؟
اثرها والزياده بتبدا تظهر بعد يوم او يومين من اخدها
وبيتسمر لمده اسبوع او ٢ وبعدها بيختفي يعني هي باعتبارها شي مؤقت بنساعد بيهو الجسم لحدي ما يبقى قادر نخاع العظام براهو يرجع يكون كريات دم بيضاء بدون مساعده
المريضه بتاخد كم حقنه؟؟
ده شي بيرجع لقرار الطبيب مبدئيا المريضه لو انكتبت ليها الحقن دي فبتاخد حقنه واحده في اليوم ولو حتاخد اكتر من حقنه فبتكون الفترة بين كل حقنه واللي بعدها ٢٤ ساعه
ملحوظه : الحقن دي ما بينفع تتعرض للضوء ولا للحرارة لانو ده بيتلفها فلو اشتريتوها ياريت تتشال في حافظه فيها ثلج او لو اضطريتو وشلتوها في كيس يكون كيس ما شفاف وما بيدخل الضوء وطبعا يكون فيهو ثلج
اتمنى يكون البوست مفيد بالنسبه ليكم ودمتم بخير وصحه وعافيه

03/04/2025

البوست ده حيكون بتكلم عن اهم المشاكل المتعلقه بالكيماوي وكيفية التعامل معاها، اولا زي ما ذكرت ليكم سابقا كل نوع من ادوية الكيماوي عندو اعراض جانبية خاصه بتختلف من نوع علاج للتاني و من مريض للتاني بس في البوست ده حنتكلم عن اهم المشاكل اللي بتواجه المرضى اللي بياخدو علاج كيماوي
اولا العلاج الكيماوي بنقص الدم والاهم من كده انو بيضعف المناعه جدا في فترة اخد الجرعة لكن الجسم بعد اسبوع او ٢ ومرات اكتر شوية بيقدر يعوض الدم اللي فقدو و يرجع مناعتو ولكن لحدي ما ده يحصل المريض ده بيكون معرض لانو يتصاب باي التهاب وممكن نزله بسيطه ترقدو مستشفى فيا ريت في الفترة دي ما نخلي مريضتنا تختلط بناس كتار يعني الزيارات الاسريه و الناس اللي جايه تسلم وتطمن ديل بكونو مع الاسف رغم نيتهم طيبه مجرد مصدر ضرر وعدوى للمريضه، حتى ناس البيت اي زول عندو نزلة او التهاب الافضل ما يحتك بالمريضه وان كان مافي مفر من تواجدو معاها يبقى يلتزم بلبس كمامه وطبعا المريضه لو اضطرت وطلعت من البيت لاي مكان يا ريت هي كمان تكون لابسه كمامه نضيفه،
طيب هل في دواء او حاجه ممكن ترفع المناعه او الدم؟؟
طبعا التغذية الكويسه لو المريضه قدرت عليها بتساعد الجسم علي التعويض بالاضافه لانو في حقن بتساعد نخاع العظام انو يزيد المناعه في احيان كتيرة بتتكتب للمرضى وهي مفيده جدا لانو اثر الحقنه الواحده بستمر ليومين او ٣ (الحقن دي شنو وكل التفاصيل عنها ايجابا وسلبا حذكرها لقدام ان شاء الله) ولكن يظل الافضل حتى مع الحقن دي ابعاد المريضه عن مصادر الالتهاب
طيب نعمل شنو لو المريضه جاتها حمى مثلا؟؟
اي حمى شديده ما مفروض نستهون بيها لمن يكون المريض بياخد كيماوي لانها دلالة التهاب وفي حالة مريصتنا اللي بتاخد كيماوي ومع انعدام المناعه او ضعفها الشديد حيتطور لانو يسبب ما يسمى بالانتان او تعفن الدم ( sepsis) ودي حالة شديده من الالتهاب، وطبعا ما نحاول نديها برانا مضاد حيوي لانو ما كل المضادات الحيويه بيتنفع مع اللي بياخدو كيماوي ونوع معين هو اللي بيفيد في الحالة وده حنتكلم عنو لقدام ان شاء الله
ثانيا العلاج الكيماوي بسبب تغير في طعم كتير من الاطعمه احيانا يعني عادي المريضه اكلة كانت بتحبها تبقى حاسه انها ما بتحبها وطعمها غريب او بتطمم بطنها والحل هنا شنو؟؟ الحل انو نخلي المريضه تجرب كم اكله لحدي ما تلقى الشي اللي بتقدر تستسيغو وطعمو مقبول ليها حسب القدرة الماديه طبعا وتواصل عليهو وهنا حابه الفت النظر لانو يا جماعه ما تحاولو تجبرو المريض علي نوع اكل معين او تمنعهو من شي معين( الا شي يكون حذركم منو الطبيب وقال انو بيتعارض مع العلاج زي مثلا عصير القريب فروت اللي بيتفاعل مع كتير من ادوية الكيماوي وممنوع يشربو العيان) لانو في الفترة دي اي شي ياكلو المريض هو احسن من العدم
ثالثا طبعا ادوية الكيماوي كتير منها بيسبب طمام واستفراغ ودي بدو المريض ليها علاجات بس مرات رغم العلاج بيحصل استفراغ او المريض ما يلتزم بعلاجو وعليه المريض لازم يلتزم تماما بالعلاجات بتاعت الاستفراغ دي وان حدث وتكرر الاستفراغ فالأفضل نودي المريضه المستشفى وما نفكر انو اصلا عادي الكيماوي بيعمل كده وطبيعي تستفرغ لانو ايوة الكيماوي بيعمل كده لكن الاستفراغ المتكرر ممكن يسبب نقص حاد للبوتاسيوم اللي ممكن يتسبب في توقف القلب او يتسبب في هبوط شديد يعني المريضه ممكن ما يقتلها الكانسر لكن ببساطه تموت لانها استفرغت كتير واحنا ما اهتمينا ودخلت في مضاعفات تانيه وعليه اي استفراغ متكرر لازم نتعامل معاهو بجديه.
وفي الختام دمتم بصحه وعافيه وفي نهاية سبتمبر شهر التوعية بسرطان المريض ياريت تشاركو الصفحه وكل المعلومات اللي فيها مع كل بت بتهمكم وتكونو جزء من حملة التوعيةبسرطان المبيض بمشاركه الهاشتاق

Address

Khartoum

Website

Alerts

Be the first to know and let us send you an email when Dealing with Ovarian Cancer posts news and promotions. Your email address will not be used for any other purpose, and you can unsubscribe at any time.

Contact The Business

Send a message to Dealing with Ovarian Cancer:

Shortcuts

Share

Category