20/08/2026
الوقت هذا اللي الطلبة تبدى تعمل في الترسيم في جامعاتها الجديدة يرجعني سبعة سنين لتالي ، كي خرجت نتيجة الباك و بعد جات فترة التوجيه و أنا سكوري 105 و حسيت الدنيا وقفت كاينه ماعادش فما مستقبل بالنسبة ليا.
على خاطر نحبوا و الا نكرهوا في بلادنا معدل الباك هو اللي باش يحددلك قيمتك و مستقبلك.
الفكرة هاذي قلقتني برشا ، على خاطر نعرف اللي أنا قادرة نعمل ماخير و نتميز.
نتفكر الحاجة الوحيدة اللي لقيتها في كتاب التوجيه اللي يخلطني ليها سكوري و اللي قريبة شوية لميولاتي هي الإجازة في الكيمياء.
تقبلت فيها و قلت ، بالك كي نتميز فيها ، نجم نضمن مستقبلي و ننسى اللي فات الكل.
تعدى الصيف و كان من أخيب الأصياف اللي تعديت بيها ، مافرحتش بنجاحي في الباك اللي من المفروض يكون انجاز على خاطرني نجحت برغم الظروف الصعيبة اللي تعديت بيها.
جاء سبتمبر و لازمني نمشي نعمل الترسيم في كلية العلوم بتونس ، مشيت أنا و عايلتي، ماتفهمونيش بالغالط ماعندي حتى مشكلة مع الكلية ، أما كيف دخلتلها ماحسيتش روحي مرتاحة، تعرفوه هاك الإحساس اللي يقلك ماهيش هاذي بلاصتك؟ موش تحقير منها لا ، أما احساس بعدم الإنتماء لا أكثر لا أقل.
قعد عندي الإحساس أذاكا لكن كملت الإجراءات الكل و رسمت في الكلية و المبيت.
أول نهارين في المبيت كانوا صعاب برشا بالنسبة ليا ، السبب الأول اللي كيف الطلبة الكل أول مرة نبعد على عايلتي و ثاني سبب هو الإحساس اللي حكيتلكم عليه.
النهار الثالث ، قلت ماعادش فيها ، ماهوش عادي اللي قاعد يصير ، بالك ربي كاتبلي حاجة أخرى ؟ و بديت نلوج و نلقى في حلول للوضعية متاعي حتى لين تعرفت على إعادة التوجيه الجامعي و الا اللي نقولولها الناس الكل ريو مارس، قلت لروحي باهي هاو فما حل ، أما زعما باش ننجح فيه بمعدل 10,28 في الباك و هوما الطلبة اللي يعديوه الكلهم تلقاهم ناقصهم شوية على الميدسين و ماخلطوش عليها ؟
حكيت لعايلتي ، لكن رفضوا فكرة العام الأبيض اللي شديت فيها صحيح على خاطر نعرف اللي أنا ماقريتش بالباهي عام الباك و ناقصني بارشا و لازمني نتفرغ لإعادة التوجيه باش نتدارك النواقص متاعي.
سايرتهم لمدة أسبوع آخر و وليت نحضر على الكور في كلية العلوم بتونس و تعرفت على عباد جدد ، لكن كي العادة ماتبدل شي و مازلت مانيش مرتاحة.
حتى جاء نهار قلت لروحي اللي نعمل فيه ماعنده مايزيدني لازمني ناخذ القرار و مانزيدش نخسر الوقت، مشيت لإدارة الكلية ، عمرت مطلب تأجيل الترسيم من غير علم حتى حد ، حتى عايلتي أقرب الناس ليا. و كيف تقبل المطلب متاعي أعلمتهم بالقرار متاعي.
سلمت على صحابي اللي تعرفت عليهم و روحت للدار و توكلت على ربي نقرا و نعاود في كل شي من الصفر.
باش مانطولش عليكم العام أذاكا صارت فيه الكورونا و عدينا مخر، عدينا في سوسة الطب و زدت عديت الشعب الشبه الطبية في المنستير حبيت نعمل Plan B باش مان ماسهليش ربي في الأولى بالك الثانية تكتب ، و هاذاكا اللي صار..
مانجحتش في الطب اللي كان الهدف متاعي الأساسي ، و كانت صدمة بالنسبة ليا على خاطرني عاودت جبت 10,48 معدل فيه مانبعدش برشا على الباك اللي جبت فيه 10.28 , قلت علاش صار هكا و أنا عديت عام من حياتي نريفز و نقرا كيفاه ؟؟ أكيد غشوني أكيد فيها رشوة الحكاية، و كي يرجع بيا الوقت نقول اللي هاذي ردة فعل عادية من الصدمة اللي صارتلي و بعد كي راجعت روحي لقيت اللي أنا عملت برشا أغلاط في الإمتحانات و الأهم من هذا الكل اللي طريقة المراجعة متاعي كانت غالطة.
بعد النتيجة المخيبة في ريو الطب ، تطلع نتيجة ريو الشعب الشبه الطبية و نلقى روحي نجحت في التبنيج و الإنعاش و جيت الرابعة على المتنافسين الكل، مانكذبش عليكم النتيجة هاذي رجعت فيا الروح و حسيت على الأقل تعبي مامشاش خسارة و ضمنت حاجة.
العام اللي بعده عملت الترسيم في المدرسة العليا لعلوم و تقنيات الصحة بالمنستير و المبيت الجامعي فطومة بورقيبة و بدينا السنة الجامعية، لكن ؟ كي العادة موش هذا اللي حبيت عليه.
مازالت عندي فرصة في إعادة التوجيه الطب ، علاش مانستغلهاش لآخر نفس ؟؟
بعد تقريبا أسبوع فقط عملت تأجيل الترسيم للمرة الثانية و توكلت على ربي نصلح في أغلاط العام الأول و نقرا على روحي.
عدينا في جامعة تونس المنار العام أذاكا في مارس و النتيجة خرجت في 31 ماي 2021 و كانت مكتوبة بالأخضر : النتيجة : ناجح(ة) و قدامها كلية الطب بالمنستير.
ماصدقتش و لأول مرة في حياتي نبكي بالفرحة ، نبكي على خاطر أثبتت لروحي قبل أي شخص آخر اللي أنا بمجهودي و تعبي نجم نوصل و ننجح و اللي معدل الباك اللي جبته عمره مايمثل إمكانياتي و عمره لا ينجم يحدني.
الحمد لله توجهت لكلية الطب بالمنستير و غادي وين حسيت بالإنتماء و كملت الخمسة سنين بتميز و توا طبيبة داخلية بالمستشفيات التونسية. ❤️
رد بالك تسلم في حلمتك ، أعمل اللي عليك و خلي الباقي على ربي 💪❤️
————————————-
إذا عندك أي سؤال و الا تحب تتعرف علينا و على عروضنا أكثر أدخلوا لموقعنا الرسمي و الا كلمونا على :
☎️ 52 666 372
