16/04/2026
يحكي صديقنا أ.ب.س على تجربة خاصة يقول:
" كنت نخدم على روحي في شركة صغيرة متع أنفورماتيك. خدمة بشهرية قليلة أما قلت أنا بطبيعتي عندي عامين ماللي تخرجت أهوكة نحسبها تكوين براتيك متع تجربة و مني نكسر ريتم البطالة فماش ما العايلة ينقصوا مالمرج و التقنقين هاو فلان خدم و عندو BTP و انت عندك ماستير و لتوة تلوج في حاجة قد صبعك... المفيد طمبشت في هالحكة و قلت بالكشي كيف تكبر الشركة يكبر المسوار.
في الأثناء تعرفت على طفلة من رادس بديت معاها العلاقة على أساس مجرد إعجاب و لكن بالوقت حسيتها تفهمني و ياسر طيبة و دافية... نهار خرجت معاها لحلق الواد، عملنا صحين حوت معتبر و تعدينا للمارينا نعملوا قهيوة بحذا الكانال. ما عجبتهاش القعدة حستها شعبية و بزهري نهارتها فمة زوز فروخ ما قصروش حاطين غنايات الفيراج في البورتابل بالعالي و تقلقت. خرجت بيها نتمشاو على حافة الكانال ... أنا من صغري ما نرتاح كان في الكانال، نحس روحي كايني تولدت في الكانال ما نعرفش علاش قمة شيختي كيف نقعد و نبقى نتفرج في الفلايك... المهم سرحت بيها شوية و قلتلها ناوي نجيب دارنا و نعملوا حاجة أوفيسيال. فرحت برشة و عنقتني و قالتلي مرحبا بيك و بداركم و تو نكلم بابا بش نفيكسيوا دات.. أنا زادة كلمت دارنا كي روحت أما الوالدة عكستني و قالتلي توة مازلت كي بديت تخدم و ماكمش هاربين عل بعضكم و العرس موش ساهل. أنا لحقيقة عاجبتني الطفلة و نحب نبني معاها حاجة في الصحيح مبعد ربي يعمل دليل...
حضرنا رواحنا و عملنا قعدة تعارف بين العايلات و الحمد لله قرينا فاتحة ... تعدات لايامات مزيانة برشة. خرجنا، تفرهدنا... برجولية حسيت روحي حبيتها برشة... ما نعرفش كيف نشوفها ننسى تمرميد الخدمة و الستراس الخايب متع العرف و شلتو ولاد العايلات المضخمين اللي ما هظمونيش حتى بعد عام و نص وجهي في وجوههم و نحنا في open space كل واحد يعس على لاخر. المهم، مشات الحكاية هكاكة و بدينا نحكيوا على ترتيبات تجهيز الدار و ريق النسا و اك الفازات الكل. بصراحة حسيت روحي بش نتضغط في الفلوس قلت وقيت نكلم العرف على زيادة بميا ولا ميتين دينار... من غدوة بعثتلو إيمايل فيه برشة ضربان لوغة أما الله غالب هو موش حاملني بطبيعتو و لازم نجيه ماللوطة. و يا ريتني ما عملت...
من غدوة عيطلي للبيرو و قلي انت راك مازلت جديد تتسمى و حتى خدمتك لتوة موش في المستوى المطلوب.. فسرتلو كل شي و حكيتلو اللي ناوي نعرس بالطفلة اللي معايا و ما فيها باس ميتين دينار خاطر 700 د ما تعمل شي و فولان يخدم معانا بعد عام طلع للمليون و نص و أنا و اياه نعديوا في نفس الخدمة! ما عجبتوش هدرتي و قلي ماكش بش تحاسبني كيفاش نخلص و برا تو نزيد ننظر في الموضوع. بعد بجمعة وليت كيف ندخل على السيستام ما نلقاش المهام متاعي و ما عادش نلقى حتى شي من خدمتي القديمة في البايبلاين. كيف سألتو علاش قلي البروجيه متاعك وفى و لازم تكوين في برنامج جديد و ما فقت كان بمكتب التشغيل يستدعاني بش يقلي علاش نسب في العرف.. و كمل حتى مركز الشرطة ناداولي قالولي اللي انت هددت العرف بالعنف على خاطر ما وافقلكش على زيادة في الشهرية... صبحت نسأل في المحامين و نستفسر و لقيت العقد CIVP ملغى خاطر أنا عملتو بعد تسعة شهور موش مديكلاري. مشيت للتفقدية ما عملولي شي. بعد بمدة لقيت روحي نسلك فيها لروحي من تهمة السب و العنف اللفظي مع العرف حتى لين سلمت و جبدت روحي مالشركة...
قعدت هكاكة مدة و خطيبتي لاحظت اللي أنا موش قد بعضي حكيتلها كل شي و بدات تواسي فيا و تشجع فيا... فرحت كيف لقيتها تشجع فيا و زادت كبرت في عيني...
تعدات لايامات و وليت كيف نطلبها ما عادش نتحصل عليها ديما... كيف نتقابلوا نحسها فادة و موش فرحانة كيما قبل... سألتها شبيك ياخي فسرتلي اللي هي تخاف من شريك حياة تكون خدمتو موش مستقرة... فسرتلها اللي هاذيكة الخدمة مع البريفي ما فماش عمل مستقر ديما المهم الواحد يخدم و يحسن من روحو... حسيتها ما اقتنعتش و مع الوقت حسيت على لسانها كلام ما حكاتوش... ما حملتش العيشة معاها و انا نخمم وقتاش النهار اللي بش تقلي ما نحبش نكمل معاك... اقترحت عليها نبعدوا فترة و لقيتها كاينها تستنى فيها... عنا أربعة شهور و كملت بلوكاتني... مازلت نخمم فيها و ما نعرفش نلوم على روحي ولا نلوم عليها ولا نلوم على الظروف و الميزيريا متع البلاد اللي واحد يقرى فيها و يلقى روحو يطلفح من بلاصة لبلاصة على زوز صوردي... كرهت روحي و ضربتني الفشلة على كل شي و ما عادش نحب نقدم في حتى شركة... عديتها أيامات نوم و قهاوي في الليل... ليوم حسيت روحي امسخ برشة و فادد من روحي.. مشيت دوشت، لبست حاجة موهرة و خرجت نحوس.. لقيت روحي ماخذ تاكسي و هبطت بحذا الكانال... شربت قهوة في المارينا و خرجت نتمشى بحذا الكانال و تفكرت نهار اللي تفاهمنا عالخطبة لهنا... ههه قداش تضحك الدنيا...نهارتها كانت الدنيا شمس و طقس مزيان... أما أنا الكانال في الأوقات الكل نشوفو مزيان و نحسو يفهمني... قعدت اللوطة نتفرج في الفلايك... شيخة ما كيفهاش شيخة... نحبك يا كانال حلق الواد... ⛵️
