07/01/2023
Saterdag 7 Januarie. Hoe was jou 1ste week van die nuwe jaar sover? Ek wil hierdie jaar meer pro-aktief deelneem om ‘n betekenisvolle lewenstorie te help skep. Mag dit jou inspireer om dieselfde te doen.
Maandag het ek die Kersboom se versierings, liggies en ster afgehaal en gebere. En bewustelik die liggie binne-in my siel aangehou – en nie ook in ‘n donker kas gebere vir later uithaal nie.... Ek het al die tafeldoeke van die afgelope funksies gewas tot elke wyn- en kosvlek uit is…Mooi skoon en reg vir die volgende feeste.
Dinsdag het ek ‘n wilde olyfboom gaan koop. Om iets te plant is vir my simbool van my commintment om self te groei en te vernuwe tot ‘n wyser uil. Ek wil aan die einde van hierdie jaar kan terugkyk na nuwe vrug aan my lewensboom se takke.
Woensdag het ek al die onkruid in my tuin (self) uitgespit en die voor-op-die-wa malvabosse wat oorneem gesnoei met ‘n (stomp) snoeisker en die onhebbelike rankplant wat so paratiseer op ander plante, met mening uitgeruk. Hierdie proses het my laat d**k aan my vriendskapstuin. Soms moet jy snoei en vennootskappe wat stagneer het laat gaan…en spasie maak vir nuwe.
Donderdag het ek my met my tam snoeisker-skouers ingebook vir ‘n spa bederf – dis ‘n voucher wat ek al met my verjaarsdag in Aug van my kinders ontvang het. Soms is dit goed om te wag vir iets waarna jy uitsien. Dan waardeer jy dit meer. Dit was ‘n absoluut hemelse twee ure: vollyf massering, daarna kop en toe die hande… Net wat ek nodig gehad het, voor ek komende Maandag 9de weer my eerste afskopfunksie het en voor die rekenaar inskuif om te skryf.
Vrydag het ek my mistroostige sypaadjie bekyk. Ek het Okt verlede jaar by die Linden Gemeenskapsdag onderneem om my sypaadjie op te knap nadat dit ‘n paar jaar gelede deur bouers wat hulle boumateriaal maande daar laat le het, verniel is. Daar was ook intussen geniepsige hael- en reenstorms ….en vragmotors wat gereeld uitspan op my yl grassies en die afgeremde skoen verder skeefgetrap het.
‘n Onderhoud op TV wat Kabous einde verlede jaar met inwoners van ‘n paar dorpe gevoer het, het my die nodige skop onder my sitvlak gegee. Hierdie mense het almal self ingeklim met herstelwerk om hulle omgewing op te knap -al was dit nie hulle “verantwoordelikheid” nie, was dit hulle eer.
So, eerder as om bitterbek te kla oor skade wat ek nie aangrig het nie, het ek gister aksie geneem en ‘n paar groot “boulders” aangekoop sodat geen voertuig voortaan op my weivelde kan parkeer nie. En geen boumateriaal daar gestort kan word nie. Volgende week sal ek met die hulp van my tuinier nuwe gras aanplant, gebreekte teer verwyder en ‘n nuwe voetpaadjie uitle. En die diep sloot in die pad voor my motorhuis sal ook herstel word….
En hoe begroot mens hiervoor, sal party vra? Eenvoudig - ek het nie uitgeeet nie, nie luukses aangekoop nie en nie met vakansie gegaan nie. Wanneer my omgewing vervalle lyk, smeer dit aan my gemoed af. Wanneer dit goed onderhou word, lig dit my gemoed op. Kry ek nuwe respek vir myself.
Vandag het ek alle rommel in groot sakke versamel om Maandag asdromme toe te gaan. Ek het reeds Desember hope bruikbare goed (wat net spasie opneem) weggegee aan die wat dit kan benut. Dit het bygedra om die jaar lekker lig binne te gaan. En daarmee eers oor en uit op hierdie Saterdag 7 Januarie 2023. Mooi leef.
