29/09/2026
ʼn Verhaal van dankbaarheid...
Saterdagmiddernag toe word ek vervaart wakker van ʼn harde slag, en ek het gewéét my man het in die badkamer geval!! Ek het natuurlik groot geskrik, en was ek vir ʼn oomblik geskok, deurmekaar en vreesbevange tegelyk. Ek kon letterlik nie dink wat nou nie! Hy was oortuig sy arm is gebreek en dit het my maak besef dat ek ʼn ambulans moet ontbied. Ek maak hom toe eers so gemaklik as moontlik en bel toe dadelik die Executive Ambulance Services in Modimolle (dis die diens wat jou spesifiek na privaat hospitale in die omgewing sal afvoer as jy ʼn mediese fonds het. Ek besef toe ook dat ek nóú hulp nodig het om manlief van die koue vloer af te kry. Hy is geskok, het geweldig pyn en kan letterlik nie op sy eie beweeg nie. Ek bel toe Reflex Secure se kontrole kamer, verduidelik my penarie, en dit was nie 3 minute later nie, toe is die lieflike Enos en Frans hier om te help... dankie, dankie!!
Hulle pak toe dadelik die spreekwoordelike bul by die horings en lig my man versigtig op en dra hom tot op die mat in die kamer waar hy regop kon sit teen die bed. Enos gaan buite toe om die ambulans te gaan inwag. Intussen daag Kobus en sy regterhand op van die Ambulansdiens. Sonder ʼn gewag ondersoek Kobus my man en sê toe dadelik die skouer is of uit die potjie uit, en/of gebreek... x-strale is nodig. Ons besluit toe dat hy Polokwane se Netcare toe geneem sal word. Koel en kalm het die manne my manlief op die bed getel, pragtig met hom gewerk, ʼn drup gekonnekteer, morfien gegee vir pyn, bloeddruk geneem en ook al die nodige inligting by my gekry, ʼn warm kombers oor hom gegooi, en in die ambulans gelaai. My vriendelik gegroet en gery. Reflex Secure se manne het gehelp en my bygestaan totdat die ambulans vertrek het, toe sê Enos vir my ek moet nou die huis baie mooi sluit en dan lekker slaap! Kosbaar!!
Ek vertel die hele storie om aan te dui hoe ongelooflik belangrik dit is om die regte telefoonnommers byderhand te hou vir daardie een groot trauma wat jou ongevraag kan tref... Mense, Reflex Secure is vir ons inwoners hulle gewig in pure goud werd!!! Ek het hulle nog altyd gewaardeer en gerespekteer, maar nou weet ek hulle is ʼn onontbeerlike ondersteunings netwerk vir ons ouerwordende gemeenskap. Dankie, so baie dankie Reflex Secure, julle is die héél beste!!
Ook vir Executive Ambulans Services, julle verdien om ʼn toekenning te kry vir uitstekende, professionele werk. En ek kan maar net uit my hart uit DANKIE-Sê ... julle en Reflex Secure was ons engele daardie aand.
Hierdie uit die hart uit dankbaarheid kom van my, Elize Duncan, en van my man, Richard Duncan, van Houtkapperstraat Gholfpark.
