Ons Spesiale Storie

01/09/2026

Vandag was so ‘n bittersoet dag vir my. Ek het die voorreg gehad om ons boekie “My Maat Pieter” vir Sannieshof se kleuterskool te gaan voorlees. Dit was immers met dié maats in my agterkop wat ek die idee vir die boekie gekry het…
Terwyl ek lees van Pieter wat nie kan stilsit nie….loop hy rond tussen deur al die maats wat sit en aandagtig luister.
Terwyl ek lees van Pieter wat soms snaakse geluide maak….weerklink sy “aaaaahhhh” geluid deur die klas.
As ek vir die maats die gedeelte lees van Pieter wat net wit kos eet, knik hul hulle koppies.
Ek het sommer ‘n knop in my keel gekry…want nou verstaan hulle hom so ‘n bietjie beter.

Hulle besef dat dit “okay” is om anders te wees en dat maatjies wat anders is, ook deel mag wees van die klas…op hul eie manier.

Daar waar die pad nog duister is, sal God ‘n pad maak. Net soos wat Hy met die boekie vir my bly wys het waar om volgende te gaan en wat om volgende te doen. Al wens ek elke dag dat hierdie nie ons pad was nie….sien ek hoe God dit ten goede laat meewerk.

Ek kan na vandag met ‘n rustige hart sê, daar is ‘n hele paar kinders wat hul maat Pieter, beter verstaan.

25/08/2026

09/08/2026

Vandag d**k ons aan al die besondere vroue wat deel is van ons kinders se wêreld.

Die mammas, oumas, juffrouens, terapeute, vriendinne en elke vrou wat moeite doen om hulle te verstaan, hulle te ondersteun en hulle net lief te hê soos hulle is.

Gelukkige Vrouedag🤍

28/07/2026

Vandag deel ek met julle baie opwindende nuus!

Ons het ’n boekie geskep wat kinders meer oor outisme leer.

Die idee vir hierdie boekie het ontstaan toe ek begin wonder het hoe die ander kinders vir Pieter by die kleuterskool sou ervaar. Sou hulle hom verstaan? Sou hulle sy manier van doen aanvaar? Dit het my hart geraak en my laat besef hoe nodig so ’n storie is.

Ek wou graag ’n boekie skep wat nie net by Pieter se situasie pas nie, maar wat ook ander kinders kan help om outisme beter te verstaan. Met die hulp van my twee skoonsussies het ons toe ingespring en saam ’n pragtige boekie gemaak wat kinders deur middel van ’n storie leer. Agter in die boek is daar ook verduidelikings oor outisme vanuit ’n mediese oogpunt.

Ons beplan nog ’n hele reeks stories oor maatjies wat elkeen op hul eie manier uniek is.

‘n Spesiale dankie aan Elanie Kamffer & Dr Elri du Preez dat jul hierdie reis saam met my aangepak het.

27/07/2026

Hierdie boodskap van oom Angus Buchan het my vandag opnuut bemoedig. Mag dit ook vir iemand anders hoop gee en jou herinner: God is steeds in beheer.

Soms raak ’n mens moedeloos en voel dit asof die pad net te swaar is. Maar juis dan moet ons onthou om aan God vas te hou, selfs wanneer ons nie verstaan wat Hy besig is om te doen nie.

THOUGHT FOR TODAY (Call Unto Me)The Lord’s word is “Yea” and “amen...

02/07/2026

Ek wil net deel hoe ongelooflik dankbaar ek is vir hulpmiddels soos ChatGPT.

Pieter verstaan nie altyd wanneer ek vir hom probeer verduidelik wat gaan gebeur nie. Verandering in sy roetine, en veral wanneer ek weggaan, kan hom baie angstig maak.

Ek en Lira gaan vir twee aande weg, en ek wou graag vir hom iets maak wat hy maklik kan verstaan. Met ou “chat” kon ek hierdie eenvoudige visuele skedule saamstel – let wel hy gaan glad nie die kos op dié prentjie eet nie 🤣

En ja… die mammahart voel altyd ’n bietjie skuldig om weg te gaan. Ek raak vreeslik gespanne as ek weet hy verstaan nie waar ek is en wanneer ek terugkom nie.

Ek besef ook hoe belangrik dit is dat Lira soms eksklusiewe tyd saam met my kry. Sy deel my elke dag met haar boetie en moet meeste van die tyd die minste wees.

Ek is opreg dankbaar vir tegnologie wat ons as ouers kan help om moeilike situasies net ’n bietjie makliker te maak.

25/06/2026

Toe ek hierdie blad in April verlede jaar begin het, was ek ongelooflik bang.

Ek het gewonder of mense sou luister, of ek die regte goed sou sê, en of ek enigsins ’n verskil sou maak. As dit nie vir hierdie kosbare vriendin () was wat my moed ingepraat het nie, sou ek waarskynlik nooit die eerste stap geneem het nie.

Vandag, net meer as ’n jaar later, sit ek terug en besef hoe ongelooflik God se hand in alles is.

In Februarie was ek op die “Net vir die Girls Finesse Cruise” en het die voorreg gehad om na Gretha Wiid se praatjie te luister. Ná die tyd het sy “toevallig” langs ons in die eetsaal kom sit. Ek kon haar toe sê dat haar praatjie my baie diep geraak het.

Daar begin ons gesels, en sy nooi my uit om saam met haar ’n “live” oor outisme te doen. Net daar, uit ’n eenvoudige gesprek, het God ’n deur oopgemaak wat ek nooit self sou kon oopmaak nie. Ek was so benoud ná daardie gesprek, want ek het nie eers geweet hoe ’n “live” werk nie.

Dit herinner my daaraan hoe maklik dit is om uit vrees terug te hou. Ons wag dikwels totdat ons gereed voel, totdat ons seker is van onsself. Maar soms vra God net dat ons die eerste stap neem.

Wanneer ons in geloof beweeg en in Sy wil stap, maak Hy deure oop wat ons nooit self sou kon oopmaak nie. Hy laat dinge groei op maniere wat ons nie eens kon droom nie.

As daar iets is wat jy al lank wil doen, maar vrees hou jou terug, laat hierdie jou teken wees: Jy hoef nie alles uit te werk voordat jy begin nie. Neem net die eerste stap. God sal die res laat gebeur in Sy tyd en in Sy wil.

Dankie aan elke persoon wat saam met ons op hierdie reis is. Julle ondersteuning, aanmoediging en liefde beteken meer vir ons as wat julle ooit sal besef.

Dankie liefste Ancke - sonder jou sou hierdie blad nie eers bestaan het nie.

26/05/2026

Baie mense vra vir my:
“Hoe kan ek ’n outistiese kind in die klaskamer beter ondersteun?”

Daarom hierdie video. 🤍

Klein goedjies maak dikwels die grootste verskil — begrip, geduld, rustigheid en om raak te sien wanneer ’n kind oorweldig voel.
Nie elke outistiese kind lyk of reageer dieselfde nie, maar elkeen verdien om verstaan en ondersteun te word.

Dankie Tilana dat jy help om meer bewusmaking te skep rondom outisme.