18/07/2026
Brief #2
Liewe Kanker
Vandag is dit twee jaar sedert jy onverwags my lewe en lyfie binnegestap het.
Jy het gedink jy gaan my storie skryf.
Jy het gedink jy gaan alles van my steel.
Jy het gedink jy gaan my lag, my drome, my kinderdae en my toekoms wegvat.
Maar jy was verkeerd.
Ja, jy het my laat huil.
Jy het my deur operasies, hospitale, inspuitings, pille, skanderings en baie moeilike dae gevat.
Jy het probeer om my liggaam moeg te maak.
Maar daar is soveel wat jy nooit kon vat nie.
Jy kon nie my glimlag steel nie.
Jy kon nie my geloof breek nie.
Jy kon nie die liefde van my familie wegneem nie.
Jy kon nie die duisende gebede stilmaak wat vir my opgegaan het nie.
Jy kon nie keer dat mense om my saamstaan nie.
En die belangrikste…
Jy kon nie God se plan vir my lewe vernietig nie.
Jy het gedink jy wen toe die dokters gesê het ek het Medulloblastoma Stage 4 Breinkanker….
Maar elke tree wat ek weer geleer loop het…
Elke laggie…
Elke skoon skandering…
Elke mylpaal…
Elke nuwe dag…
…was ’n herinnering dat jy nie die laaste sê het nie.
Ek is nie net ’n kankerpasiënt nie.
Ek is ’n oorwinnaar.
Jy het letsels gelos.
Jy het herinneringe gelos.
Maar jy het ook iets anders gelos…
’n Getuienis van God se genade.
So vandag, twee jaar later, kyk ek nie terug met vrees nie.
Ek kyk terug met DANKBAARHEID.
Want jy het my nie vernietig nie.
Jy het my nie gebreek nie.
Jy het nie gewen nie.
My naam is Liam Jacobs.
En my storie gaan nie oor kanker nie.
My storie gaan oor HOOP.
Oor GELOOF.
Oor WONDERWERKE.
En oor ’n God wat steeds GENEES.
Van,
Liam
💛🎗️
