13/11/2025
Toe sy linkerhand twee jaar gelede by die Silwerskermfees in Kaapstad só bewe dat sy springmielies die hele voorportaal vol spat, het hy finaal besluit om nie langer te wag om diepbreinstimulasie (DBS) te ondergaan nie, vertel Tim du Plessis, gewese koerantredakteur en aktualiteitshoof by kykNET, in Bruis. “Toe die Pretoriase neuroloog die elektrodes in my brein aanskakel, het my linkerhand die eerste keer in vyf jaar nie gebewe nie. Die bewing was heeltemal weg. Dit was vir my ’n groot oomblik. Die feit dat ek nie meer sigbare simptome het nie, maak dit beslis vir my makliker om met Parkinsonsiekte saam te leef,” sê Tim. ’n Neuroloog het Parkinsonsiekte einde 2018 by hom gediagnoseer. Hy was aanvanklik geskok deur die diagnose. “Ek het dit glad nie verwag nie. Dit het ’n maand of twee geduur om in te sink. Maar die neuroloog se woorde dat ek waarskynlik ondanks die siekte nog lank kan leef, was ’n troos. Dis ’n progressiewe siekte en ek kan niks daaraan doen nie; daar’s nie ’n geneesmiddel nie, maar ek het besluit ek gaan na my beste vermoë voort met my lewe solank ek kan. Dit help ook baie dat my vrou, Inge, my ondersteun.”
* Enige Parkinson-pasiënt wat Tim wil kontak, kan by [email protected] aan hom skryf.
