16/04/2026
BHW sa Don Salvador Lopez, Nagpa-Drug Test para sa Drug-Free Workplace
Nagpakita og lig-on nga paningkamot alang sa limpyo ug matinud-anong serbisyo ang mga Barangay Health Workers (BHWs) sa Don Salvador Lopez, Mati City pinaagi sa ilang boluntaryong pagpa-drug test.
Ang mga BHWs, nga mao ang unang modangat sa panginahanglan sa komunidad ilabi na sa panglawas, naghatag og ehemplo sa integridad ug disiplina. Pinaagi sa pag-apil sa drug testing, ilang gipakita nga ang serbisyo publiko kinahanglan sinugdanan sa kaugalingong responsibilidad ug kaandam.
Sumala sa mga opisyal sa LGU Mati City, kini nga lakang usa ka paagi aron mapalig-on ang pagsalig sa katawhan ngadto sa ilang mga health workers, ug usa usab ka pahayag nga seryoso ang LGU sa pagsuporta sa kampanya batok sa ilegal nga droga.
Padayon ang panaw sa Don Salvador Lopez padulong sa usa ka malinawon, himsog, ug drug-free nga komunidad—uban ang mga BHWs nga nag-una sa maayong ehemplo.
